Two-party system, suportado ni Cong. Solis kan Sorsogon

Sorsogon – Suportado ni Cong. Jose Solis kan Sorsogon an House Bill 3655 o The Political Party Development Act na pinadrinuhan ni Cong. Juan Edgardo Angara alagad igwa so boot siyang gustong i-insert igdi. Sigon ki Solis, magkakanigo sana na maging two party system an ipasunod igdi sa Pilipinas asin an gastos sa kampanya an dapat na pasanon kan gobyerno. Bako man daang mga oligarch an maggastos sa kampanya kan mga kandidato huli sa nagkakaigwa pa nin utang na boot sa mga ini. Kung manggagana man daa an mga sinupurtaran nindang kandidato nagbabawi an mga ini asin sampolong doble pa man an ginigibong pagsingil. Klarado man daa na nagiging causa ini kan corruption kaya mas maray sigon sa kongresista na duwa sana an partido. Gusto man kaning ibugtak sa nasabing propuesto na makakabalyo sanang partido an sarong pulitiko makalihis an sarong eleksyon na dae nagdalagan sa arinman na duwang partido.