NAGA CITY – Padagos pa man giraray an pagpapasakit kan motocycle gang sa syudad nin Naga makalihis na liwat na naman na mag-operar. An insidente nangyari pocomas humenos alas una nin hapon kansubago sa kalabaan kan Panganiban Drive. Ini makaagi na hipaan kan tolong persona na nakalunad sa motorsiklo an behikulo na kolor gray na Nissan Exalta with plate number EDK-888 kan negocianteng si Edgardo Roxas asin agom kani na si Rosario, may kagrugaring kan Edrox Construction. Sa istorya ni Rosario pinaputokan kan mga armadong suspechado an ruweda kan sasakyan kan makoa na an kwarta gikan sa saiya tanganing dae na sinda makalamag pa. Inot kani pigtutukan sinda nin badil kan saro sa tolong mga suspechado mantang nagserbing look out an duwa pang pag-iriba. Sapiritan na pinagpabukasan an bentana kan sasakyan asin pirit na inagaw an leather bag na may laman nin kwarta. Sigon pa man ki Mrs. Roxas na kan makapangodto sinda sa sarong restaurant nagderetso na sinda sa Land Bank Naga asin nagwithraw nin kantidad P500 mil pesos. Apwera man kaiyan, haros igwa pa siyang kulang-kulang dos sientos mil de pesos na dati nang nakabugtak sa bag na kutana ipapasueldo sa saindang mga empleado. Kaibahan pa man sa nawara iyu an Nokia cellphone,pasaporte asin man iba-ibang ATM asin Credit Cards. Sinabi pa man ni Rosario na sa grabi soboot na katakutan asin paghuna na an nadangog na putok kan badil tuminama sa saiyang agom napiritan niyang itao an bag. Nagdurar nin magkapirang minutos an paghoholdup asin tolos na nagdurulag an mga suspetsado.
RSS Feed