Mga suspetsado sa paggadan sa staff ni Cong. Zamora, hinahanap sa Bicol

Camarines Norte – Pinahiwas pa ngonian kan mga awtoridad an paghanap sa mga suspetsado sa panggagadan sa chief of staff ni Compostela Valley Cong. Manuel “Way Kurat” Zamora. Ini makalihis na mapag-araman na taga-Camarines Norte an maysadiri kan van na ginamit kan tolong armado na buminadil sa staff kan kongresista na si Robert Delano. Magigirumdoman na nagadan an biktima kan nakalihis na petsa kan presenteng bulan mientras na paluwas sa saiyang harong sa Quezon City. Sa naging pahayag man man kan Camarines Norte Provincial Office, nakipag-koordinar na sa sainda an pamayo kan Task Force Delano na si Sr. Supt. Franklin Moises Mabanag nganing maaraman ang iniistaran kan maysadiri kan behikulo. Sinabi man ni Col. Noel Constantino, an Provincial Director kan Camarines Norte, nagpaluwas na siyang kasuguan sa saiyang mga kabuhan na magkondukta nin beripikasyon mapapadapit sa ipinaabot sa saindang impormasyon. Napag-araman na nakarehistro an sasakyan sa ciudad kan Pasig alagad an address kan maysadiri iyo digde sa Bicol. Nagsayuma man na ibulgar kan pulisya an eksaktong address alagad ini an nakaistar so boot sa sarong subdivision.