Pili, Camarines Sur - Pigkompirmar ni Commanding General Jeffrey Sodusta kan 9th ID Phil Army na mayo pa sindang nareresibeng anuman na direktiba hale sa higher headquarters na nagsusugo na iuntok na an military operation asin iba pa nindang aktibidad kontra sa mga rebelde. Segun ki General Sodusta, magayun an plano kan gobyerno na temporaryong isuspendir ngona an military operation huli kan pag romdom kan kapaskuhan asin pag abot kan bagong taon, alagad dae pa sinda mauntok huli ta mayo pa ning sugo sainda. Sa ngonian, sosog ki Sodusta, magpapadagos an saindang trabaho ngani na pangatamanan an paz y orden sa palibot asin ralapagon an mga rebelde arog kan New Peoples Army o NPA. Engkaso, mag abot na an direktiba, tulos niya ining ipaaabot sa mga commander kan militar sa bikol nganing insigida na ipautob. Pigromdom pa kan heneral na kan nakaaguing taon na resibe ninda an order kan SOMO, ini pig-implementar antes na mag abot an aldaw kan kapaskuhan asin nagtapos bagong taon. Kasumpay kaini, sinabi pa kan heneral na tutugutan nindang makapuli sa pamilya idtong mga soldados na mga taga bisaya asin mindanao mantang idtong mga taga bikol an matenir sa kampo nganin gibohon pa an saindang trabaho maski ngonian na holiday season.

Naga City – Maipapautob na an Iserve Ordinance o mas bistado sa kaapudan na Priviledge Card Ordinance kan Naga City sa masunod na taon kan 2009. Segun ki Councilor John Bongat, maipapasunod na ini dara kan nagrarani nang pag-aprubar sa 2009 annual budget kan siyudad kun sain igwang nakatalaan na pondo para digdi. May obheto an nasambitang ordinansa na gibuhon na madali sa mga namamanwaan an pag-avail kan mga serbisyo kan lokal na gobyerno sa paagi kan ipapaluwas na mga priviledge card. Idinugang pa ni Bongat na katuyuhan pa kan ordinance na matabangan an mga indigents, kababaihan, senior citizens asin disabled persons kan Naga City sa saindang mga kahahagadan sa gobyerno partikular na gikan sa mga frontline services kan siyudad. Nilinaw man kan Konsehal na kabali sa mga frontline services na ini an mga opisina kan City Health Office, MetroPeso, City Population and Nutrition, Senior Citizens' Office asin City Social Welfare Office.

Pili, Camarines Sur – Padagos an sesyon nguniyan kan Sangguniang Panlalawigan kan Camarines Sur tanganing tulos nang maaprubaran an proposed annual budget kan probinsiya para sa masunod na taon nin 2009. Inasigurar ni Bokal Angel Naval an publiko na posibleng maaprubaran na ini sa Biyernes. An nasambitang budget an gagamiton kan manlain-lain na opisina kan lokal na gobyerno kan Cam. Sur sa masunod na taon tanganing padagos na matawan nin serbisyo kaini an mga namamanwaan. Segun pa ki Naval, nagkakantidad man nin 1.4 bilyon de pesos an total kan annual budget. Idinugang pa man niya na lampas ining 2 milyon kumparar sa budget kan nakaaging taon. Miyentrastanto, nakatalaan man na gamiton an kantidad na ini sa mga programa kan probinsiya katakod kan social services, livelihood programs asin salud.
Mientras tanto, sa ciudad nin Naga, presenteng pinag-aadalan pa kan konseho an proposed annual budget kan siyudad para sa taon kan 2009 segun ki Konsehal John Bongat. Nagkakantidad man ini nin 430 milyon de pesos, 15 milyones na mas halangkaw kumparar sa budget kan nakalihis na taon. Myentrastanto, inistimar man kan Konsehal na nasa 250 milyones de pesos digdi an internal revenue allotment (IRA) kan siyudad. Idinugang man ni Bongat na nakatalaang gamiton an budget na ini sa mga programa kan Naga na katakod kan edukasyon, social services asin salud. Posible naman suboot na maaprubaran na ini nguniyan na maabot na Biyernes. Alagad, dai man kabali sa pondong ini an pagpapahirahay kan pampubliko merkado kan Naga City ta igwa naman na nakatalang kwarta para digdi na gikan man sa solisitasyon, donasyon asin prinomesang tabang kan mga Senador kan nasyon Pilipinas. Magigirumduman na nasulo pa sana an Naga City Supermarket kan nakalihis na bulan nin Oktubre.