Masbate - Limang parasisira an nagadan sa pagsabog kan homemade bombs sa provincia kan Masbate. Sa impormasyong ipinaabot ni Police Senior Supt. Reuben Theodore Sindac kan Masbate PPO asin Col. Eliazar Bron, PIO kan PRO5 na an mga biktima iyu an binistong sinda Noel Banez y Dela Cruz, 45 anyos, Genelito Banez y Dela Cruz, 37 anyos, Robell Gajupo y Recto, 29 anyos, Ruby Morales, 23 anyos asin Francis Ayos y Tornea, 23 anyos; anas residentes kan Bgy. Pajo banwaan kan Balud, nabanggit na provincia. Bandang alas-4:30 kasuogma mantang naggigibo nin improvised explosives an mga biktima na gagamiton kutana sa illegal fishing kan aksidenteng masabugan an mga ini. Dead on the spot si Robell Gajupo asin Francis Ayos mantang dead on arrival man sa Balud hospital si Genelito Banez. Sinda Noel Banez asin Ruby Morales iyu an binawian nin buhay sa MMG hospital mantang pigbubulong kan mga doktor huli naman sa sinapo na lugad sa manlaen-lae na parte kan saindang lawas. Katakud kani, pinagirumduman kan mga otoridad an mga parasisira na dai na magsagibo nin illegal fishing sa kadagatan kan Masbate nganing maibitaran an kaparehong insidente. Higot man na pig-iimbestigaran ngonian kan Balud PNP asin Masbate PPO an nangyaring insidente.
Legazpi City - Kasunod kan serye nin pang-aatake kan mga miembros kan rebeldeng New People's Army (NPA) sa nagkatolong provincia sa Bicol kan nagtalikod na mga aldaw, urog pang hinigutan ngonian kan mga militar siringman pulisya an saindang operasyon kontra sa mga rebelde. Magigirumduman na enot ng pinagharass kan mga miembros kan SPARU unit kan NPA an 5th PRMG detachment sa Bgy. Taysan digdi sa Legazpi sa Albay, pigsundan man kan pagpapasabog sa globe cellsite sa banwaan kan Sta. Elena Bgy Tabugon, Camarines Norte kun saen totally damaged an bintana kan harong ni Bgy Kapitan Arestio E. Jopio asin an pinakahuri iyu an engkwentro na nangyari kasuogmang pagkaaga sa pagultanan kan nasa 30 miembros kan rebeldeng NPA asin scout rangers na ikinairido ni PFC Baglinit mantang dai pa man madeterminaran kun nagkapira sa lado kan mga rebelde. Alagad sa ipinaluwas na statement kan CPP-NPA-NDF Bicol, mayong nakulgan sa saindang lado huli ta tulos man na nakaibitar an mga ini. Magigirumdumang Agosto presenteng taon kan sunod-sunod man na atakehon kan mga rebelde an globe cellsites sa Bicol asin panghaharass sa mga detachment kan PNP asin militar. Naga City – Sarong 22 anios na soltero an nagdesisyon na tapuson an saiyang buhay makalihis na magkaigwa sindang iwal kan saiyang ilusyon. Sa imbestigasyon kan Naga City Police Office, an pagbigti kan biktimang si Real Delos Santos y Buñag matapos na magkaigwa sindang diskusyunan kan ilusyon na si Lalyn Bendejo y Gonzales,18, na parehong taga-Del Rosario, Pamplona, Camarines Sur. Nadukayan an biktima na nakabitay gamit an lubid nin abaka sa pinag-aarkilahan na boarding house sa Zone 1, Sta. Cruz Puro, Naga City. Napag-araman na nagta-trabaho sa sarong resto bar an biktima. Kan magresponde an mga pulis dae na man naabutan na nakabitay si Delos Santos huli pinag-agapan na ini kan saiyang mga ka-boardmate. Nadara pa man kuta an biktima sa ospital an biktima alagad ini an pigdeklarar kan mga doktor na dead on arrival. Paracale, Cam. Norte - Higot pa man giraray an pagtutok ngonian kan Departamento de Salud sa anumang masunod na pwedesir na mangyari sa walong baranggay sa banwaan kan Paracale, Camarines Norte matapos na magdeklarar nin malaria outbreak an DOH kan nakalihis na bulan huli naman sa biglaan na pagsakat kan numero kan malaria sa lugar. Segun ki Camilo Aquino kan Communicable Disease Prevention Cluster kan DOH, saindang higot na pigmomonitor an development sa lugar dahilan sa makusog pa man soboot an potensyal na magbalik an helang dahilan ta dai man basta-basta nawawara an bacteria sa lawas kan tawo na nagkaigwa nin malaria. Ipinag-insister ni Aquino na makusog pa man an posibilidad na magbalik an helang kun kaya haloy an pag-bantay sa siring kaning helang.Sinabi pa kani na apwera sa banwaan kan Paracale, an kataid na banwaan na Jose Panganiban iyu an saro man soboot sa potential na magkaigwa nin malaria dahilan sa palibot kani kun kaya higot man ninda ining pigbabantayan. Sorsogon – Nairido an sarong miembro kan scout rangers kan Philippine Army sa nangyaring engkwentro sa pag-ultanan kan mga rebeldeng New People's Army (NPA) asin militar sa provincia kan Sorsogon. Bandang alas-6:15 kansoogmang pagkaaga kan makaengkwentro kan sarong section kan scout rangers na pinamamayuhan ni Lt. Custodio an kinakarkulong nasa 30 miembros kan NPA sa Barangay Nazareno, Gubat. Nagdurar nin 45 minutos an ribayan nin putok kan ag-ibong na lado na nagresulta sa pagkakairido ni Private First Class Baglinit na tinamaan nin shrapnel kan M203 mantang dai man maaraman sa lado kan mga rebelde. Narecover sa lugar kan insidente an kagamitan asin dokumentos kan mga NPA, 1 icom radio, medical tools, 4 claymore mines asin 1 gitara. Mientrastanto, sa ipinaluwas na statement kan CPP-NPA-NDF Bicol, ipinahayag kan tagapagtaram kani na si Ka Greg Bañares na nagpalyar na makubkob kan militar an saindang pigtataguan asin sinabing mayong nagadan sa saindang lado dahilan sa ligtas na nakadulag an saindang mga pag-iriba mantang dai man soboot maaraman an WIA asin igwang nagadan sa lado kan tropa kan gobierno. Camarines Norte - Makalihis i-harass an detachment kan Regional Mobile Group (RMG) sa ciudad nin Legazpi kan nakalihis na aldaw, mag-uumagahon kansoogma kan atakehon kan mga miembros kan rebeldeng New People's Army (NPA) an globe cellsite sa provincia kan Camarines Norte. Bandang alas-12:26 nin mag-umagahon kan sakyadahon asin laugon an lugar kan kinamumugtakan kan tower kan globe sa Bgy. Tabugon, Sta. Elena. Basado sa inisyal na imbestigasyon kan Sta Elena PNP asin Camarines Norte PPO, pinagputol kan mga rebelde an cyclone wire nganing makalaog sa lugar asin kan nasa laog na an mga ini pinag-apunan nin improvised explosive device an ibabang parte kan tower. Huli naman sa impact kan pagsabog, nagkaigwa nin partial damage an tower mantang an bintana man sa residensya ni Bgy. Captain Arestio E. Jopio an totally damaged alagad mayo man na naireport na nagkaigwa nin casualties.Nagpapadagos sa ngonian an hot pursuit operation kan mga otoridad kontra sa mga nakadulag na miembros kan rebeldeng NPA asin pighigutan na man an seguridad pati na man sa mga pagtaraid na lugar. San Fernando, Cam. Sur – Dae oyon an mga residentes kan banwaan kan San Fernando, Camarines Sur na gibuhon na apunan sinda nin basura kan ciudad nin Naga. Ini an saindang naging reaksyon makalihis na ipahayag ni Environment and Natural Resources Officer Oscar Orosco na saro sa saindang planong tindugan kan Sanitary Landfill iyo an nasambitan na banwaan. Tinawan doon pa man kan mga taga-San Fernando na dae dapat na darahon kan Naga an sobrang bata sa saindang lugar huli sa malinig an saindang banwaan. Naghahandal man sinda na baka maghatod ini nin malaen na problema sa saindang salud asin sa kabuhayan huli sa posibleng madanyaran igdi an saindang mga fishponds. Maroromdoman na enot na pinagplanuhan kan ciudad na tindugan kan sanitary landfill an Carangcang, Magarao alagad entero man na nagkontra igdi an mga residentes asin mismong mga barangay officials kan nasambitan na lugar. Manonotaran na nagsayuma man na makaagan kan nasabing basurahan iyo an banwaan kan Pili siring man an ibang mga barangay kan Naga City. Siruma, Camarines Sur – Dae pa man giraray nadudukayan hasta sa presente an apat na mga parasisira na nawawara igdi sa provincia can Camarines Sur kan nakalihis pang petsa 20, ngonian na bulan. Sosog ki Jenis Nidea can grupo can KABALIKAT na kabale sa naghahanap sa nasabing mga parasisira, sa duwang aldaw nindang paghahanap dae pa ninda nanunuparan an apat. Mientras tanto, plano man na ipagpadagos an paghanap kina Randy Tatad, Rubin Rin Jr., Manny Bueno asin Edlyn Jamito kan Butawanan, Siruma, Camarines Sur. Kansoogma man dikit-dikitan pang maaksidente an grupong naghahanap na kinababalihan kan KABALIKAT asin Coastguard Bicol makalihis na maputol an katig kan inarkilang sasakyan pandagat kan magtama ini sa gapo. Naga City – Ipinadara na kansubanggui sa Metro Manila an mga kinolektang samples kan Bureau of Food and Drugs sa mga gatas na pinagpapabakal digde sa Camarines Sur tanganing isairarom sa eksaminasyon. Sosog ki Sylvia Lopez, an food and regulation officer kan BFAD, limang mga lugar igdi sa provincia an kinoanan nin samples na kinababalihan kan Naga City, Iriga City asin mga banwaan kan Pili, Goa asin Calabanga. Sa kumpirmasyon man ni Lopez, igwa na sindang kabilugan na 67 na mga establishemento na napasyaran asin haros gabos sa mga ini an may ipinapabakal na repak na gatas hale sa nacion kan China. Kansoogma man, igwa sindang natipon na 29 samples kan nasambitan na mga gatas para isairarom sa analysis. Kaibahan sa mga kinoanan nin samples kan grupo kan BFAD iyo an gatas na Arla, Puregold, Farmland, Dairy Cows Milk, Dairy amerika, Milkboy, Candlewedmilk, Powder China Milk, Jollycow Slender Fat Milk, asin Jolly Cow Pure Fresh Milk. Mientras tanto, igwa man daang kinoang samples sa mga pioneer biscuits asin kendi na hale man sa China asin nakatalaan man na isunod an mga tinapay na posibleng ginamitan kan kontaminadong gatas hale sa nasambitan na nacion. Legazpi City -- The 12th Orgullo kan Bikol Regional Trade Fair promises to be a best selling fair this year as it once again brings to the fore the beauty and bounty of Bicolandia on October 2-5 at the SM Megamall in Mandaluyong City. In support to the activity spearheaded by the Department of Trade and Industry (DTI), the Bicol Designers Association (BIDEAS) will set-up a special setting showcasing different raw materials that had been transformed into novelty artworks. |
RSS Feed