Camarines Sur – Nagkaigwa nin pagbalasa sa hepatura kan Philippine National Police (PNP) kan Calabanga asin Pili nin huli sa sunud-sunod na shooting incident sa banwaan kan Pili na dai pa natatawan nin kalinawan sagkod ngunyan. Nagkaigwa nin turn-over kan nakalihis na petsa dos kan bulan na presente sa Camarines Sur PNP Provincial Command sa pangengenot ni Provincial Director Col. Rodolfo Llorca kun sain nag-swap sinda Col. Froilan Navarosa kan Pili asin si Maj. Virgilio Olalia Jr kan Calabanga. Sosog sa pahayag kan PNP, natural sana suboot an pagbalasa nin mga tauhan sa laog kan kapupulisan. Alagad, dai mahali an mga huringhuding asin paghuna kan kadaklan na an nangyaring pagbalasa an resulta kan maluyang liderato ni Col. Navarosa katakod kan mga krimen na dai pa nareresolbaran sagkod ngunyan.

Masbate - Dae na nakaligtas an sarong trece anyos na biktima na dawa nagtuturog na sana man sa laog kan saindang harong tinamaan pa nin stray bullet. Nabisto an biktimang si Daryl Relos y Villar kan Brgy Paniqui, Aroroy, Masbate. Tama nin bala sa payo an sinapo kan biktima na tolos man na nadara sa ospital para sa magkakanigong asistencia medical. Dai pa maaraman kun sisay an nasa likod kan pagpapaputok kan badil mantang nasa katahawan kan pagsabat kan bagong taon.

Naga City - Apat na persona na biktima nin paputok an idinalagan sa Bicol Medical Center antes na mag-alas dose nin matanga sa pagsabat kan New Year. Kabale sa mga naputukan nin kwitis iyo an sarong soltero na tinamaan harani sa saiyang to-ong mata. Nabisto ini na si Ernesto Salvador,23, kan Marupit, Camaligan na kung haen igwang nainum na arak kan mangyari an insidente. Naputukan man nin 5-star sa saiyang kamot an taga-Villa Sorabella, Naga City na si Sonny Mateo mientras na tinamaan man nin luces sa lalawgon an 4 anios na si Christian Delovino kan Del Rosario, Canaman, Camarines Sur. Saro pa man na akui an tinamaan nin kwitis sa saiyang habayan na tolos man na naidalagan sa ospital.

Ocampo, Camarines Sur - Gadan an sarong daragita makalihis na maligis nin sarong motorsiklo sa banwaan kan Ocampo, Camarines Sur. Nabisto an biktima na si Annie Dela Vega, 15 anios kan barangay Hibago kan naunambitan na banwaan. Sosog sa istorya kan ina kan biktima na si Lydia Dela Vega, nabudalan kan motorsiklo an saindang nalulunadan na trimobile asin nahulog an biktima siring man an saro pang kaibahan kani na nakalunad sa lubutan kan driver. Saro man na motosiklo na kasabatan an nakaligis ki Annie dalan para ini an magkabarari-an nin takyag asin magruluwas pa an tu-lang. Nangyari an insidente kan papoli-on na an biktima mag-aalas dose nin matanga makalihis na magsimba sa pagsabat sa bagong taon.