Salamat sa liwat na pagsalbar sa Bikolandia

Kan nakalihis na semana sa sakuyang pagbabakasyon sa Albay, (June 20, 2008, Friday) napano nin takot asin kahandalan an sakuyang puso kawsa kan nagbabana-banang pagrapado kan Bagyong Frank sa Bikol Region. Kan aldaw na idto, signal number 3 na sa Albay asin mate ko na an grabeng takot kan mga tawo na nasasabatan ko. Gabos sinda naghihidali na makapuli, mag-impake kan mga bado asin nagkakapirang mga gamit na kakaipohan ninda sa temporamenteng pagtiner sa mga evacuation centers. Naglilibot na an mga personahe kan MDCC, PDCC asin OCD na nagpapaguiromdom sa mga residentes na naka-istar harane sa mga salog na mag-ebakwar sa halangkaw na lugar. Maski an Simbahan Katolika, nangapodan sa mga residentes na dae makalingaw na magpangadye asin maghagad tabang sa Dios ngani na isalbar an Rehiyon sa panibagong huma na dara kan Bagyo. An gabos na mga lakdang na ini, an pagtatarabagangan kan mga opisyal kan gobierno, NGO, simbahan asin kan mga residentes, an saro sa mga naheheling kong rason kun nata sa liwat nakasalbar an Bicol kontra sa huma na dara nin kalamidad. Alagad mawot ko man na maheling na bako sana toyong may kalamidad nagkakasararo sa paghiro an mga Bicolano, Sana sa gabos na panahon magkasararo na kita. Lingawan an dingkilan sa pulitika, komunidad...an pagkakaiba nin pagtobod asin iba pa. Sana siertohon na kan mga awtoridad an kalidad kan saindang mga proyektong  pam-imprastraktura arog kan mga dike asin dam na iyo man an toyong nagko-collapse pag pigrarapado na nin bagyo asin makosog na uran an rehiyon. Hontokon ta na an pagbasol sa mga opisyal, imbes kita mismo an magheling kun ano an satuyang sadit na maitatabang ngani man na satuya ng dagos na malikayan an grabeng destroso sa pagkabuhay asin buhay kan mga kalamidad na nag-aabot sa rehiyon. Asin an pinakahuri asin pinaka-importante sa gabos, dae ta paglingawan na magpasalamat sa Dios dahilan sa liwat niya na pigdangog an satuyang pangadyeon asin sa liwat, nakalbar an satuyang rehiyon sa grabeng destroso na dara ni Bagyong Frank.